DOI - 23/05/2008

"Fl-ippjanar u t-tfassil ta’ proġetti pubbliċi, qed tingħata importanza partikolari għall-użu maħsub għal dak il-proġett partikolari.  Dan iwassal biex ikollna proġetti ppjanati aħjar u li minnhom il-pubbliku jagħmel l-aħjar użu."

Dan qalu l-Ministru għar-Rizorsi u l-Affarijiet Rurali George Pullicino meta dalgħodu żar ix-xogħol li għaddej fuq it-tisbiħ tal-promenade f’San Ġiljan, fl-inħawi magħrufa bħala Xatt is-Sajjieda.

Il-Ministru Pullicino enfasizza li l-promenade trid titqies bħala waħda u għalhekk għandu jkun hemm kontinwità mill-Gżira sa San Ġiljan.  Dan japplika għad-disinn, għal street furniture kif ukoll għal kull ippjanar ieħor li hemm bżonn li jsir.

Hu saħaq li kwalunkwe xogħol li qed isir, u li għad irid isir, ser jagħti każ tal-bżonnijiet tas-sajjieda li jaħdmu fil-post u qal li dawn jagħtu karattru lill-villaġġ ta’ San Ġiljan.  Hu qal li s-sajjieda ser jibqgħu jkunu kkonsultati fuq kull aspett li b’xi mod jista’ jolqot l-attività tagħhom.

Intant, ix-xogħol ta’ tisbiħ tal-promenade ta’ Xatt is-Sajjieda qiegħed isir minn ħaddiema tat-Taqsima tax-Xogħlijiet tal-Ministeru għar-Rizorsi u l-Affarijiet Rurali.  Ix-xogħlijiet jinkludu l-pavimentar mill-ġdid tax-xatt u t-tqegħid ta’ madum b’mod li jkun hemm differenza bejn il-parti pedonali u l-post fejn is-sajjieda jistgħu jgħaddu bid-dgħajjes tagħhom.

L-estensjoni tal-promenade fiha ftit inqas minn 2000 metru kwadru ta’ pavimentar u x-xogħol huwa mistenni li jitlesta fil-bidu ta’ Lulju.  L-ispiża ta’ dan il-proġett hija ta’ madwar  €170,000 (Lm79,981).